নুও দিনোর স্ববন-বিকেন চেগে

-
ফুদিবো পহর, আন্ধার ভাঙিনে;
এব নুও রং, নুও দিন বন্দা জাগেনে।
কুরি ফুলোন ফুদিবাক তুম্বাজে
পেক্খোন দুও মিলিবাক আগাজে।
.
কিজিঙত ফুদিবো পহর,
গুমোরত জুলিবো চেরাক, তর মর।
আঙোচ্ছের যেধক নিগুচ্যাবল-
ঊধি যেব, ঊধিব; এব নুও দিনর ধল।
.
তারুমত জোলিবো বোম্বা, জুমত;
তারাউন জোলিবাক, আন্ধার মনত।
অসবন যেধক তর আ মর,
ছেয় ওই যেব, উরিব; ভিজিব এলে ঝর।
.
ইজোত্তুন বাঝি রবো কানসুঘ আনিবো;
অনতিত্যার জীংহানি সুঘোপহর দেঘিবো।
ধান সিজিওন ধুলিবাক, আল্যেং ঝারিনে
রানজুনী উদিবো সাতরং সিধিনে!
.
আঝার বঝরর যেধক আন্ধার;
পহর ওই উদিবো মনর বন্দার।
জুমগাবুর জুমরান দেঘেয় নাজিবো
নুন্যসীল, তাগলক সমার পেই আঝিবো।
.
নুও দিনর সবন
.
বিকেন চেগে
.
৯.৪.২০
মায়াসোটা, আমনগুধি
.
রঅভেদ
নিগুচ্যাবল -তোচ্ছে, দুঘ খাবানা
জুমগাবুর-তুজিম জুম, ভরনভিরোন জুম
জুমরান-দোল, সৌন্দর্য
অসবন-দুঃসবন, বজং চিদে!

Comments

Post a Comment

Popular posts from this blog

বেলত্তমা জীংকানি-করুন জ্যোতি চাঙমা

-
দিঃবে হঃ দারিত্তে গরি ফুলসুমুরি গজ টিক্কেট হুরদন।বোইয়েরঃ নাঙ বাচ নেই।হরান্নে অলে এ্যান অকতত চিদ ন বিচ্চ্যে চিকচিক্যে লাগে।দাঙদাঙ্গে চেরোপালা।মাদি চক্কর চক্কর গরি ফাত্তে।গাজত্তুন রাঙা রাঙা বুড়ো অয়ি পাদানি ঝরি যেয়ে।হরান্নের তঅত বেক আঙুরি অয়ি।চিগোন চিগোন ঝুরিঝারি শুগে যেয়ে।বড় ছড়াত পানিনাল মরা মরা ওয়ি।ছড়া পারত বাচবনর ছাবাত ঝরিপোচ্চ্যে ঝারবো নাকসা ফুলুন এবঃ সং পোতপোত্যে আগন।পানি নাল গোদা হুলুগ অয়ি।ছড়া ইযিয়ের হরমে।এ্যান অকতত লাঙেলঃ আদ্ধানত এক্কান চিগোন আলগ ঘর মুত্তি দক গরি থিগেই আগে।ইজোরান তেনজং অয়ি।ভালক বুলোন অয়ি পাপাং, হালিক ঘর নানুবোর সোর গরিবার নাঙবাচ নেই ।ইজোরত হয়িক্কো টেপ পোচ্চে পিলে গচ্চাদন।নারিহুলোর মালালোই বানেয়ে পানি লই দি ধোরোনি গান জলে ধোচ্চে গানি তঅতদ শুগেনেই থগরা মু গরি চেই আগে।ঘরর চেরোপালা বিরবিচ্চ্যে, সাঙসাঙ্গে।ঘরানত বানা দি বুচ্চে বুড়ি থান্ন্যে।দিন্নোবো এলে হামত যান।সাঝ অং অং গরি দে অরান গরি ঘরত ফিরন।বেন্নে ঘুমত্তুন উদিবাক ও হিজেহিচ্চ্যে আধাআত্ত্যে গরি ভাততোন রানন।হলাপাদা লোই মোচা গরি লন।যাদে সলাত আদ্ধানত ছড়াত চাদারাত থাগল ধারেই লন।বুচ্চ্যে বুড়ি হামঝারি মানুচ। সবাই বোজি ন...
Read more