কবিতা,নাড়েইছুড়ির দুগ-অনন্ত চাকমা

নাড়েছুড়ির দুগ!

অনন্ত চাঙমা

রুপে রঙে সাজেয়ি এলো দোল এক্কান নাঙ
হিলো বুগোত চাঙমা বাজার নাড়েছুড়িয়ান।
চেরোহিত্তে মোনমুড়ো,সাজিয়ে জুম চাগালা
বাঙাল তগেলে দারু নেই, দিগিদু চাঙমা বানা
মঙলবারে বাজার বজিদু, বেক্কানি পে'ধ
হারাঙ মাদাত, লেই মাদাত "মা" বাজারত যেদ
উচ্চোপুচ্চোই যেদুং মুই ভিসিআর চা
হাদ্য জিনিস দেগিলি জিয়ান মনে হয় 'হা।
দুগি মানুচ্চুন বাজ হাবিদাক তবুও এলাক সুগে
আদা -আত্তি মনর সুগে, দিন হাদেদাক বেগে।
হঠাৎ গুরি সুগো নিজেস বন্ধ অল তারার
লারে আগুনে পুড়ি গেল নাড়েছুড়ি বাজার!
২০১৪ সালত এপ্রিলোত পুড়ি গেল বাজারান
ধুমো লগে উড়ি গেল,তারার সুগো হবালান!
হধক দুগোত এলাক, পিদে পিদে রয়ুন তারা
টেঙা থেলেয়ু বাজার নেই, বেক্কানি এল মানা!
ঝারো আলু তোগে তোগে হদক পরান বাজানা
ওতারা এচ্চুন শুনিলি, বেক্কুন এগত্তর অনা!
নয়েল ভাত পানি, নয়েল মিজেল,দুগ আর দুগ
জাদর আগুন ফুগেই, ফিরি নয়েজে এভ সুগ!
বিধি গেল ৬'বু বজর,মরা গুত্তেয়ুন আগন টিগে
৪ ঘন্টা পদ আদি, বাবুছড়া বাজার হেদাক বেগে!
হেট টেঙা গাড়ি ভাড়া হরজ অয়,হি আর গরানা
মাদাত বাজারর হাল্লোং বুগি,ঘরত ফিরানা!
তবুও এলাক সুগে, জাদত্যে বেক্কানি মানি লনা
ভালেদর চিদে নগুরি,হন বাবদে পরান বাজানা
জুম নেই,বাজার নেই, নিজেস বন্ধ অয় তারার
পো-ছাবা লেগা পুড়ি নপাত্তন,নেই ভালেদ অবার!
বিদেজ বুক চিড়ি,দেজত লুমিলোগি করোনা
লক ডাউনোত ভাইরাসে নধুরি,নহেই মরানা!
শহর হোল্লি আত টানিলি পাদন বেক্কানি
নাড়েছুড়িত হিলোই পরান বাজের,দেগর'নি !
হুদু যেয়ুন বাপ -ভেই, দুগো সময়ত তুমি নেই!
নাড়েছুড়ি দুগ চগোই,লারে গুরিয়ে জুম্ম ভেই
ওহ! ভেইলক, হদক থেবং এই দুগোত
২০১৪ সালর দুগ ফিরি এচ্যি,নাড়েছুড়ি বুগোত!
বাজার বন্ধ হি হেবাক? তুমি এক্কা আত বাড়ো না
দুগো সময় তুমি নথেলে, তারা হেঙিরি বাজানা!
আদাম থিয়ে তারারে হোরাবি দগোই এক মাজর
পরান বাজিলি বেড়েয়োগই বজর পর বজর!
তুমি গেলে হনদিন উবোজ নরাগান তারা
জাদ ভেই ভাবিনেই দুগো সময়ত এলাক যারা।
করোনা দুর্যোগোত তোমা আজায় বুজি আগন
ফোনে হধা হোই, মরে হলাক দুগোত আগন!
জাদর লারে গুরিয়ে বাপ-ভেই,যেবানি হবর ধরা?
চোল,নুন,সিদোল আদত গুরি নাড়েছুড়িত যেদা।
দুগো সময়ত রিনি চগোই,হিলো বুগোর আভা
ত্রাণ দিপাল্লেগই জনমান ইদোত রাগেবাক তারা।
৩ এপ্রিল ২০২০ ইং।