সোনাত্তুক-করুন জ্যোতি চাকমা

রাঙাচানরে এচ্চে ভারি হুজি হুজি লাগের।তা মনত বানা এক্কান সিদে ওয়ি দে ইক্কু।মনে মনে হদা দারা বান্দা গরিলো দে, তে যিয়ান সার সিয়ান হামাক্কায় যেনে পারে গরিবো।হেয়ো জনে হবর নঃ পেবাক।হাররে নঃ হবঃ।তা পরানর সমাচ্চে পূণ্যধনরেও না।হিজেনি-যুনি তারে হয় অলে তাত্তুন আক্কে আক্কে যেনেই জিদি লবঃ গোই।বিশ্বেস নেই এ পুণ্যধনরে।বর পাঁজি।সে হেপত হেক্কে গরি তারে ঠোগেনেই নাদেংগো হারি নেয়ে সিয়ান এব সং পরাগ পরাগ গরি ইধোত আগে রাঙাচানর।যেদক বেচ ভাবের সেদক বেচ ম্যুওন এক্কান হবর ন পেয়ে আজালোই পোতপোত্যে ওই উদের তার।হুজিয়ে দোলে দালে ভাতও হে নঃ পারের, ঘুমও যে ন পারের তে।এগপল্লা পেলে হাম ওয়ি।এচ্চ্যে ফুল বিঝু।এযেত্তে হেল্লে মুর বিঝু।
রাঙাচানর বাপ্পো বিঝু বাজারত যেয়ে।ভালক্কানি সরং হানি সারা দে রাঙাচানে তা বাবরে।

এক্কান ধোপধোপ্প্যে নরম-হরম টেন্নেহানি, চুল আজুরেদে ফুনি, সনুপাউডার-ভালক্কানি।তা বাবে হামাক্কায় আনি দিবো হয়ি।হন্না বেচ দোল দোল সরংহানি পাঝু লক্কে জিতবাত চল সমাচ্চ্যে সমাচ্চ্যে।হালিক রাঙাচানর যুদো সিদে গান বেচ ওয়ি।
তা সং সমাচ্চ্যে বেগ বিঝুত্তেই উবোলপাল ওয়োন।হুদু হুদু বিঝু খা যেবাক, হন্না হন্না যেবাক সে পোইদেনে টেম্মাঙত বোচ্চোন তারা।পূণ্যধন দাগি ঘরঃ সিদেনে দি বড় আমগাচ্ছো ছাবাত বোচ্চোন পৃণ্যধন,নুনুক্কে, হান্দারা, হালিচোগা, বান্ধারা দাগি।রাঙাচনরে যেবাত্তেই হোয়োন।তে নঃ যায়।তা চিদে গান বেচ ওয়ি ইনদি।হি চিদে? সোনাত্তুগও চিদে।

২.গেল্লে রেত্তোদ রাঙাচানে তা আজুত্তুন পচ্চন শুননে।তা আজু তারে দোলে দালে ভাঙ্গি দে বিঝু হিত্তেই পালান।গোদা বজরবো নানাবাবত্তে হামে হামে থান বেগে।বজরবো ভিদিরে হি হি বিদি যায় ঠিক পত্তর নেই।হদঃ হঃদ এযে, হদঃ সুগ-অসুগ অয়।গোদা বজরত মান্ন্যে দুগও পান, সুগও পান।যা হামে তে আজের নঃ থান।সেনত্তেই গোদা বজরবো তারা বেক্কুনে মিলিনেই রঙধঙ গরিবার ঝুঃ ন পান।তে বজর মাদাত ইক্কো দিন অলদে বিঝু দিন, সিবেত তারা বেক্কুনে রঙধঙ গরন।তা ঘরত তে, তা ঘরত তে বেড়াবেড়ি গরন ।

দে পারাপরি নেই, রিচারিচ্চ্যে, হোচ্চ্যে হেরেঙাল, পিজুম গরাগরি যেদক ভজং হাম আগে সিয়ানি  পুরোন বজর লগে লগে বরছড়ার পানিত গোঙার লগে ভাজে দোন।হুজি গরি, ধারাচ গোচ্চে ন্যুও বজরবো আওজে রঙেধঙে গোজি লন।এ অলদে বিঝুর হধা।মন দি শুনিলো রাঙাচানে।হালিক তার এক্কান হধা ভারি গরি পিজের গরিবার পরানে হর।তা আজু আগেদি তারে হোয়িদে "বিঝু গুলো" হধা।তা আজুরে বিঝুগুলো হধা পিজের গরিলো।তা আজু এক্কা মু চিমে চিমে আজিলো।তে হো ধরিলো।বিঝু লক্কে বেন্নে পোত্যে বড়ছড়াত গাদানা রিদিসুদোমত আগে।পুরোন বজর হোজোরা গানি ধোই ফেলা পরে।হোবুলো গরন বিঝু লক্কে যে ন গাদিবো তে আক জনমত হেনা শুগোর এবগোই।তে তা আজু এক্কা হধাগান বাড়েই হল, "যে বেচ দোলে দালে গঙা মারে তবনা গরি  হেইয়ের হোজোরা ধোই ফেলে পারিবো গঙা মা তারে বিঝুগুলো দে"। তে বিঝু গুলোবো হি পিজের গরে রাঙাচানে। তা আজু হল, "সিবে অলদে ইক্কো জলং জলং সোনাত্তুক।যিবে ফেলে রাজা উদি পায়।" সিত্তুন ধরি রাঙাচানে উবোলপাল ওয়ি সে বিঝুগুলো বু পেবাত্তেই।

৩.বিঝু দিন্নো এল।হেল্লে রাঙাচানে বলে ঘুম যে পাচ্ছি দে।বিঝুগুলো, সোনাত্তুকও হধা ভাপ্পে।সে হধা ইধোত গরি ঘুম যেয়ে।রেদোত দোল দোল স্ববন দেক্কে।তে বুলে সোনাত্তুক্কো পেয়ে।তে রাজা উত্তে।এক্কান দাঙর রাজারো ঘরত থান তারা।উরোন পিরোন পরা নেই।হানা পিনার পরা নেই।হি হেবে হা।জলং জলং সোনা রুবো ভুদি ঠিগে ভুদি।ইক্কো রাঙাচানা দোল মিলে বুলে লোয়ি তে।ভালক্কানি দেল স্ববনে।আদাক্ক্যে গরি পোত্য আমল্যে রাদা ডাগত জাগি উদিলো রাঙাচানে।তে যুরো গরি উদি বর ছড়াত মেক্কে লর দিল।তা আজুও থান পেয়ে।রাঙাচানে  লারে লারে গরি ছড়াত লুঙিলোগোই।
সক্কে সেরাং বেরাং অর গোদা।যা গরিবার যাদি গরা পরিবো।হাক্কে মানুচ এবাক।
মনান এগামনে উজু গরি গঙা মারে তবনা গরিলো।তে দোলে দালে গাদিলো।
হিয়ের হোজোরা আ মনর হোজোরা বেগ গঙার লগে ভাজে দিলো।সাঙসাঙে গরি নাল হিত্যে রেনি সেই থেল।হন সোনাত্তুক্কো ভাজি এযে নি।পরান ঘরান ধুকধুগো ধোচ্চি।হেইয়্যে গান গিরগিরার।এ হক্কে এযে সোনাত্তুক্কো।হাক্কন পর বুরো পাদালোই মজা গোচ্চে দলা ইক্কো ভাজি এযদে দেল।সোনাত্তুক.....! বড় বড় চোগ গরি রেনি চেই আগে সে মেক্কে রাঙাচানে।হন হিত্যেত চোগ নেই আর তার।তা চোগ মজাবো মেক্কে।

লারে লারে মজাবো তা হাই এল।রাঙাচানে চেরোপালা বিলবিলে ল।তে বাগত ধরি মজাবো তুলি লল।হিজে হিচ্চে গরি হুলি চেল।ওমা! চাইদি ভিদিরে হুদু সোনাত্তুক! ভিদিরে বর ইক্কো শুগুনো গুরু ঘু দোলা! পেক্কেলেঙ গরি পানিত ফেলে দি ল।মনে মনে বজমান লাজত প ল।লাজে গালচাবা আ হান রাঙা ওয়ি।চেরোপালা দোলে রেনি চেল হন্না আগে নাহি।"ইয়েন হামাক্কায় পুণ্যধন হরম, মরে লাজত পেলেলদে! হালিক থে দ হন হবর ন পায়", মনে মনে হল রাঙাচানে।লাজে, রাগে হানঙ হানঙ গরি শিল্লোত ব ল।যেরেদি তা আজু আহজি রাগে ন পারি বাচ দুবো সেরেত্তুন নিগিলিলো।রাঙাচানে তা আজুরে দেনেই বজমান আমক অ ল।ইবান সালেন আজু হরম! তা আজু তা হাই এ ল।গলি পরি পরি এযের।হল, "হি বুচ্চ্যে, হেজান দিলুঙ?" রাঙাচানে লাজে আ রাগে ভোদা মু গরি র ল।চোগো পানি চেরাং চেরাং গরি চেই র ল তা আজুরে।তা আজু এবারত আজি থামেল।তা নাদিন্নোরে বুগোত টানি ল ল। "বুচ্চ্যে, মরে মাফ গরিচ, তরে আযল সোনাত্তুক হারে হয় সিনেবাত্তেই মর ইবান গরা পচ্চ্যে।"
  -তে আযল সোনাত্তুক হি আজু?
-আয় ঘরত যেই, আযল সোনাত্তুক সিদু আগে।



৪. দি আত্ত্যে নাদিনে এগুগঙে ঘরত এলাক।তা আজু তারে ঢিঙিশালত নেযে ল। ওলোদো বত্তেগুনত্তুন ওলোদ আ ধান বত্তেগুনত্তুন ধান ল ল।তে রাঙাচানঃ মেক্কে রেনি চেল।

-বুচ্চ্যে, সা, আমি অলংগে দুক্কাম হাম গরি হেয়ে মানুচ।হাম ন গরিলে হেই ন পেই।আমাত্তেই এই ওলোদ আ ধান অলদে সনাত্তুক।
-আজু?!
-অদে বুচ্চ্যে, ন্যুঔ বজর গোযি লনা ন্যুও আজা লোই, যেন দোলেদালে সুগে মঙ্গলে থেই পারি আ দুক্কান হাম গরি পারি।আমার সোনাত্তুক ইবানি।

রাঙাচানে বুঝি গেল হি হবার চার তা আজু।হাম গরদে তার আলসি গরে।মাত্তর বর বর স্ববণ দেগে।হালিক হাম ন গরিলে হেনে বাজানা? এগ বাবর এগ পুত্র তে।বুড়ো অলে তা মা বাবরে রেনি চেই পেব।তারে হিয়েই ফেল আলসি গরি বোজি থানা।বেক্কানি বুজি পারিলো রাঙাচানে।
তে ডুমুরি যেই তা আজুরে আজা গরি গুজুরি গুজুরি হানিলো।

-আজু, এচ্চেত্তুন ধরি মুই আলসি ন ওম আর! বুঝিপাচ্চোং বেক!

তা আজু থিরোচ মোচ্চে ইক্কো আজি দিল চুবে চুবে।

-ওয়ি বুচ্চ্যে ন হানিচ।এচ্চ্যে বিঝু।জুক্কুলাগোই।দি জনে বিজু হা যেদং মালেন।

-অদে আজু, এপল্লাত তল্লোই বিচু হেবংগে।

-দোলে সাজিচ বুজো বুচ্চ্যে, ইক্কো গাবুর মিলে সেদঙ মালেন।

-অদে অদে আজু।হা হা হা।ত দোক্কেন আজু থাক্কে মর হি মিলে চিদে?

-অইনি, বুচ্চ্যে?

-অদে আজু।

-হা হা হা হা

তে দি আত্তে নাদিনে গীত গেই গেই বিঝু হা নামিলেক।

লেখক:করুন জ্যোতি চাকমা